ინფო თბილისი თრეველი

თბილისი – მცხეთის ტური

თბილისი საქართველოს უძველესი დედაქალაქია, სადაც დაახლოებით 1 500 000 ადამიანი ცხოვრობს. იგი დაარსებულია მე-5 საუკუნეში საქართველოს მეფის, ვახტანგ გორგასლის მიერ. თბილისი ქვეყნის ინდუსტრიული, სოციალური და კულტურული ცენტრია. 

ძველი თბილისი და გოგირდის აბანოები – გოგირდის აბანოებთან არის დაკავშირებული თბილისის დაარსების ისტორია. ლეგენდის მიხედვით ვახტანგ გორგასალმა ნადირობის დროს აღმოაჩინა გოგირდის თბილი წყლები და თბილისის სახელწოდებაც სიტყვიდან “თბილი” მომდინარეობს. 

ნარიყალას ციხე - იგი აშენებულია IV ს.-ში. თბილისის ისტორიას უამრავი ბრძოლა ახსოვს ციხის ასაღებად ირანელ, ჩრდილო კავკასიელ, ბიზანტიელ და არაბ დამპყრობლებთან გადატანილი. ციხის ტერიტორიაზე დგას მე-13 საუკუნეში აგებული წმინდა ნიკოლოზის ეკლესია. 

მეტეხის ეკლესია - იგი აშენებულია V ს.-ში ვახტანგ გორგასლის მეფობის დროს და აღსანიშნავია იმით, რომ ეკლესიის ეზოდან ჩანს ძველი თბილისის ულამაზესი ხედები. 

სამების ტაძარი - წმინდა სამების ტაძარი ყველაზე დიდი მართმადიდებლური საკათედრო ტაძარია არა მარტო საქართველოში, არამედ მთელს კავკასიაში. მისი სიმაღლე არის 100 მ. სამების ტერიტორიაზე მდებარეობს 12 სხვადასხვა წმინდანის სახელზე აშენებული ეკლესია. 

თბილისის ეროვნული მუზეუმი - მუზეუმში ინახება ქართული კულტურული მემკვიდრეობის ნიმუშები. უამრავი ისტორიული მნიშვნელობის ნივთებთან ერთად თქვენ აქ შეგიძლიათ ნახოთ დმანისის გათხრების შედეგად აღმოჩენილი ევროპაში ყველაზე ძველი ადამიანის თავის ქალები. 

მცხეთა. 

ეს პატარა, ულამაზესი ქალაქი საქართველოს სულიერების ცენტრად ითვლება. 

სვეტიცხოველი - პირველად პატარა ტაძარი აშენდა მე-4 საუკუნეში, რის შემდეგაც საუკუნეების განმავლობაში ტაძარი უფრო გრანდიოზული და შთამბეჭდავი გახდა. აღსანიშნავია, რომ სვეტიცხოველში ინახება იესო ქრისტეს კვართი, რომელიც თავის დროზე იერუსალიმიდან საქართველოში იქნა ჩამობრძანებული. ძეგლი დაცულია UNESCO-ს მიერ. 

ჯვრის მონასტერი – მონასტერი აშენებულია მე-6 საუკუნეში. მონასტრის ტერიტორიიდან იშლება მშვენიერი ხედი. აქედან შეგიძლიათ ერთდროულად დაინახოთ თბილისიც და მცხეთაც. მონასტერი მოქმედია და იქ ბერები ცხოვრობენ. 

მომსახურებაში შედის: 

- ტრანსპორტი 
- გიდი 
- სადილი
- მუზეუმის ბილეთები 

ტურის ხანგრძლივობა 6 საათი. 

მოთხოვნის შესაბამისად შეგვიძლია შემოგთავაზოთ ტურის შემოკლებული ვარიანტიც 

ბირთვისის ციხე (უიქენდ ტური)

ბირთვისი ციხე მდებარეობს ქვემო ქართლში, საქართველოს სამხრეთ ნაწილში, თბილისიდან 55 კილომეტრის მანძილზე.
იმ ციხის უცნაურობა გახლავთ ის, რომ იგი მიწიდან ბუნებრივად ამოზიდული უზარმაზარი ქვებისგან შეკრული ნაგებობა გახლავთ. მასივი იმდენად მაღალია, რომ მისი აღება საუკუნეების განმავლობაში ვერავინ შეძლო ცნობილი თემურ-ლენგის გარდა, რომელმაც რამოდენიმე თვიანი უშედეგო ალყის შემდეგ მის დასაპყრობად სპეციალური მონადირეები და მთამსვლელები ჩამოიყვანა.
ძალიან უცნაური და სასიამოვნოა აგრეთვე ეფექტი, რომელსაც ახდენს ცხელ ზაფხულში ბირთვისის კლდეებსა და კანიონებში უეცრად აღმოჩენილი სიგრილე.
ტური შესაძლებელია დასრულდეს იმავე დღეს, ხოლო სურვილის შემთხვევაში შესაძლებელია ღამე კარვებში ან გამოქვაბულებში გათენება, რომელიც უხვად არის ამ ტერიტორიაზე.

მომსახურებაში შედის:
- სურვილის შემთხვევაში 
- ღამის თევა კარავში ან გამოქვაბულში
- ტრანსპორტი
- გიდი
- სადილი

დავით გარეჯი – იოანე ნათლისმცემელი. (უიქენდ ტური)

"დავით გარეჯი" და "იოანე ნათლისმცემელი" ერთმანეთისაგან რამოდენიმე კილომეტრით დაცილებული კლდეში ნაკვეთი ბერების საცხოვრებელი სამონასტრო კომპლექსებია,
სადაც საუკუნეების განმავლობაში ათასობით ბერი მოღვაწეობდა. ისტორიაში ცნობილია მუსულმანი მხედართმთავრების მიერ ამ სამონასტრო კომპლექსების დაპყრობა და აწიოკება,
როდესაც მარტო ერთ დღეს ქრისტიანობისათვის თავი შესწირა 5000 ბერმა, რომელთაც სარწმუნოების შეცვლას სთხოვდნენ.

ბერების კელიები მოხატულია შუასაუკუნეების დროინდელი ფრესკებითა და ორნამენტებით.

ტური 1 დღიანია. დავით გარეჯის სამონასტრო კომპლექსი მდებარეობს თბილისიდან 60 კილომეტრში.

მომსახურებაში შედის:
- ტრანსპორტი
- გიდი
- სადილი
 

სიღნაღი – ბოდბე (უიქენდ ტური)

სიღნაღი საქართველოს ერთ-ერთი ულამაზესი ქალაქია. მეტად შთამბეჭდავი ადგილმდებარეობის გარდა იგი იმითაც გამოირჩევა, რომ ქალაქისა და მისი შემოგარენის ტერიტორიაზე აღმოჩენილია ანტიკური ხანის იშვიათი ნივთები და ნაკეთობები, რომლებიც სიღნაღის მუზეუმშია მოთავსებული. XIX - XX საუკუნეებში კი ქალაქი გადაიქცა მხატვრების, თეატრალური მოღვაწეების, მწერლებისა და ხელოვნების სფეროს მოღვაწეთა თავშეყრის ადგილად.

ბოდბის მონასტერი (VI- VII ს), იმით არის ცნობილი, რომ იქ მონასტერში მდებარეობს მოციქულთა სწორის – წმინდა ნინოს საფლავი. განუმეორებელ შთაბეჭდილებას ტოვებს ეკლესიის ეზოდან გადაშლილი ალაზნის ველის თვალწარმტაცი ხედი.

ტური შესაძლებელია დასრულდეს იმავე დღეს. სურვილის შემთხვევაში შესაძლებელია ღამის გათენება სიღნაღის ერთ-ერთ სასტუმროში, სადაც გაგიმასპინძლდებიან საუკეთესო მზარეულები. კახეთში საუკეთესო კერძებთან ერთად აუცილებლად მოიაზრება მსოფლიოში განთქმული კახური ღვინოც.

მომსახურებაში შედის:
- სურვილის შემთხვევაში
-სასტუმრო
- ტრანსპორტი
- გიდი
- სადილი
 

 ყაზბეგი – გერგეტის სამება (უიქენდ ტური)

ყაზბეგი – საქართველოში ზღვის დონიდან ყველაზე მაღლა დასახლებული ქალაქია ( 1600 მ ). იგი მოქცეულია კავკასიონის მთათა სისტემასა ( 4000-5000 მ ) და მწვერვალ "მყინვარწვერს" ( 5033 მ ) შორის. ხოლო ქალაქის თავზე, "მყინვარწვერის" კალთაზე მდებარეობს ძალიან ეფექტური და ლამაზი ეკლესია – "გერგეტის სამება".

ამ რეგიონში, რომელსაც ხევი ეწოდება, განთქმულია ქართული სუფრის ერთ-ერთი საუკეთესო კერძის – მოხევური ხინკალის დამზადების ტრადიცია, რომელსაც აქ სტუმრობის შემთხვევაში აუცილებლად იგემებთ.
გზაზე შეგვიძლია აგრეთვე ვინახულოთ XV საუკუნის სარეზიდენციო ანსამბლი "ანანური".
ტური შესაძლებელია დასრულდეს იმავე დღეს, ხოლო სურვილის შემთხვევაში შესაძლებელია ღამე ყაზბეგის სასტუმროში გათენება და კიდევ ერთი დღით დატკბობა ამ ბუმბერაზი კავკასიის მთების შუაში მოქცეული ლამაზი ქალაქით.

მომსახურებაში შედის:

- სურვილის შემთხვევაში 
- სასტუმრო ყაზბეგში
- ტრანსპორტი
- გიდი
- სადილი
 

რკონის სამონასტრო კომპლექსი (უიქენდ ტური)

რკონის სამონასტრო კომპლექსი მდებარეობს თბილისიდან 100 კილომეტრის დაშორებით თეძამის ულამაზეს ხეობაში. ეს ადგილი მდიდარია XII საუკუნეში საქართველოს სახელგანთქმული დედოფლის -თამარის ინიციატივით აშენებული საკმაოდ კარგად შემონახული სხვადასხვა ტიპის არქიტექტურული ძეგლებით. ციხეები, თაღური ქვის ხიდი მდინარე თეძამზე, სამონასტრო კომპლექსი, ბერების საცხოვრებელი კელიები, კლდეში ნაკვეთი ტაძარი საეკლესიო საგანძურის შესანახად – ეს ის ჩამონათვალია, რომელთა ნახვაც თქვენ შეგიძლიათ ამ საუცხოო ადგილას მცირე ხნით დასასვენებლად ჩასვლის დროს.

ტური შესაძლებელია დასრულდეს იმავე დღეს, ხოლო სურვილის შემთხვევაში შესაძლებელია ღამე კარვებში გათენება და კიდევ ერთი ლამაზი დღის გატარება თეძამის ხეობაში.

მომსახურებაში შედის:

- სურვილის შემთხვევაში 
– ღამისთევა კარავში
- ტრანსპორტი
- გიდი
- სადილი